ပြင်ဦးလွင် – မန္တလေးအဆင်းလမ်းမှာ ယာဥ်တိုက်မှုဖြစ်ပြီး ချောက်ထဲကားပြုတ်ကျလို့ နှစ်ယောက်သေ တယောက်ဒဏ်ရာရ

ဩဂုတ် ၁ ၊ ၂၀၂၅
GG (VOM)
မန္တလေးတိုင်း ၊ ပြင်ဦးလွင်မြို့နယ် ၊ ပြင်ဦးလွင် – အဆင်း မိုင်တိုင် ၁၆ / ၁၇ အကြား ၊အိုးတလုံးကွေ့အနီး မှာ ဇူလိုင် ၃၁ ရက်နေ့ညပိုင်းက ၂၂ ဘီးကားနဲ့ အံစာတုံးကား တိုက်မိပြီး နှစ်ယောက်သေဆုံးကာ တယောက်ထိခိုက်ဒဏ်ရာရရှိခဲ့တယ်လို့သိရပါတယ်။
၂၂ ဘီးကားက အရှိန်မထိန်းနိုင်ဘဲ အံစားတုံးကားကို နောက်မှဝင်တိုက်မိပြီး ၂၂ ဘီးကားက လမ်းဘေးရှိ ပေ ၁၅၀ ကျော်နက်တဲ့ချောက်ထဲကို ပြုတ်ကျခဲ့ပြီး အဆိုပါ ကားပေါ်လိုက်လာတဲ့ အမျိုးသားနှစ်ယောက်သေဆုံးခဲ့တာဖြစ်တယ်လို့သိရပါတယ်။
” သေတာက ယာဥ်မောင်းနဲ့ယာဥ်အကူပေါ့။ ကားကချောက်ထဲကျသွားတော့ အလောင်းကိုတောင် မနည်းသယ်ထုတ်လိုက်ရတယ်။၂၂ ဘီးကားက သကြားတင်လာတာ။အရှိန်များပြီးမထိန်းနိုင်ဘဲ အံစားတုံးကိုဝင်တိုက်ပြီး ချောက်ထဲကျသွားတာ။” လို့ ဒေသခံ လုမှုကူညီရေးအဖွဲ့ဝင် တယောက်ကပြောပါတယ်။
ယာဥ်တိုက်မှုအတွင်းထိခိုက်ဒဏ်ရာရရှိခဲ့တဲ့ အမျိုးသမီးကတော့ အံစားတုံးကားပေါ်ကဖြစ်ပြီး ဒဏ်ရာအခြေအနေက မစိုးရိမ်ရကြောင်းနဲ့ သေဆုံးအမျိုးသားနှစ်ယောက်ကိုတော့ ပြင်ဦးလွင် ဆေးရုံကိုပို့ဆောင်ခဲ့တယ်လို့သိရပါတယ်။
ဇွန် ၁၆ ရက်တုန်းကလည်း အဆိုပါ ပြင်ဦးလွင်-မန္တလေးအဆင်းလမ်း၊ မိုင်တိုင်အမှတ် ၁၉ မှာ ဝက်မတင်ဆောင်မောင်းနှင်လာတဲ့ခြောက်
ဘီးကားတစီး အရှိန်မထိန်းနိုင်ဘဲ တိမ်းမှောက်ကာ အမျိုးသားသုံးယောက်ထိခိုက်ဒဏ်ရာရရှိခဲ့တယ်လို့သိရပါတယ်။
ဓာတ်ပုံ – သန္တိသုခ/MFSD

Related posts

Leave a Comment

VOM News

FREE
VIEW